Dæs! - (stuna á íslensku)

Stundum þarf maður að "dæsa". Stundum dæsir maður yfir engu sérstöku, en oftast er það nú vegna þess að manni mislíkar eitthvað, en það kemur fyrir að maður dæsir vegna þess að manni líður vel. Svo að maður tali nú aðeins um neikvæða dæsið, þá getur maður dæst töluvert yfir heimsku manna, líka minni eigin heimsku, því enginn er fullkominn, því miður eða sem betur fer, kannski. Ef allir væru fullkomnir, myndi maður þá ekki bara dæsa af leiðindum? Ég t.d. dæsi í hvert skipti sem ég mæti bíl með þokuljósinn í botni, þrátt fyrir að engin þoka er sjáanleg! Bara af því að það er hægt að kveikja einhver f*****g þokuljós, þurfa ansi margir að monta sig yfir því að sýna öðrum bílstjórum, að bíllinn þeirra er með flott þokuljós. Og stundum dæsir maður yfir því að mæta bíl, sem er kannski bara með kveikt á stöðuljósi og kemur ansi oft fyrir að maður mætir svoleiðis bíl í myrkri. Það kemur nú stundum stórt dæs frá manni þegar hljóðkútslausir bílar eru að þenja sig upp og niður götuna hjá manni. Einnig er hægt að dæsa hressilega yfir pólitíkinni, reyndar verður það meira hnuss en dæs, sérstaklega þegar sandkassaleikirnir byrja á Alþingi.

Eins og ég nefndi áðann, þá er líka hægt að dæsa þegar manni líður vel, t.d. í dag, dæsti ég yfir fallegu veðri hér á nesinu á leiðinni heim úr vinnu, bjart og fallegt veður, fjallahringurinn í öllu sínu veldi. Ég dæsti líka yfir því að vera kominn í helgarfrí og dæsti vel yfir núðluréttinum, sem ég mallaði fyrir familíjuna í kveld. Og þvílíkt dæs þegar ég settist í nýja sófann yfir fréttunum í kvöld! Og ég get lofað ykkur því að það verður dæsað þegar ég fer að sofa í kvöld, eftir að hafa lesið í hinu nýja tímaritinu hans Illuga, Sagan öll. Flott tímarit um sagnfræði og ég dæsi yfir skemmtilegri sagnfræði.

Dæs fyrir því!

Athugasemdir

[Ólafur fannberg, 23.2.2007 kl. 22:24]

dæsum og dæsum....

[Sigrún Friðriksdóttir, 24.2.2007 kl. 02:39]

Dæs frá mér til þín

[Heiða B. Heiðars, 26.2.2007 kl. 01:34]

Ég hvæsi nú frekar en dæsi yfir þokuljósum og hljóðkútslausum bílum!

Annars reyni ég að dæsa bara yfir góðum hlutum. Lofaði sjálfri mér að taka aldrei upp "æi þú ert svo ómögulegur"dæsið hennar mömmu! En hún notaði það sem stjórntæki á pabba öll mín uppvaxtarár! Ótrúlegt hvað eitt dæs getur sagt mikið

[Margrét M, 26.2.2007 kl. 11:23]

dæs .. heh he