Smjörklípan á ferð?

Geir og Grani (fyrirgefið, Björn átti þetta að vera!) héldu víst fund í Valhöll um helgina og er það nú barasta allt í lagi með það, enda er þetta bara svona, að “samherjar” þurfa víst að styðja við bakið á hvor öðrum. Tildrög fundarins eru víst þær, að sýna Grana (æ, fyrirgefið, Birni átti þetta að vera) stuðning. Hvers vegna? Jú, samkvæmt því sem Geir sagði, þá læddist víst að honum sá grunur “að óprúttnir aðilar stæðu á bak við þessar árásir á Grana” (dís, mar hvað er í gangi, Björn átti þetta að vera!) Og eins og Baldni gamli benti réttilega á, þá eru það einu aðilarnir sem hafa víst gagnrýnt Björn (loksings!) eru SUS-arar! Og vegna hvers? Jú vegna þess að Björn ætlar að leggja fram LEYNDÓ-frumvarp í vetur. Og það eru SUS-arar ekki sáttir við.
Fundurinn átti víst að vera til að sýna kjósendum Íhaldsins að í herbúðum þeirra væri nú barasta allt í lagi og engin ágreiningur eða valdabarátta í gangi. Skrítin tímasetning.

Lesa má þessar vangaveltur af vef Egils Helgasonar hér.

Ja, svona er þetta bara!

Svona er þetta bara!

Þessi fyrirsögn sem ég set á þetta blogg, heyrði ég í þætti Egils í hádeginu og er höfð eftir einum af þeim ungu frambjóðendum sem eru að fara í prófkjör. Var þetta rök hennar fyrir þeirri stefnu sem hún er fylgjandi að “svona er þetta bara” og hreinlega ekkert við því að gera! Sem sagt, ef frjálshyggjan ræður ekki við klúðrirð, þá er það viðkvæðið og þeirra einu rök að svona sé þetta bara og við geturm ekkert gert í málinu! Það má eignlega segja að hún hafi verið Andrík í að viðhalda sama frjálshyggjubullinu áfram og menn hafi hvatt sig til að taka þátt í prófkjöri, vegna þess að hún væri eina hægri sinnaða frjálshyggjumaðurinn í Sjálfstæðisfloknum!

Ja hérna, svona er þetta bara!

Það var gaman að hlusta á rök Jóns Baldvins um hlerunarmálin og viðbrögð íhaldsins af þeim málum. Það vissu allir að menn njósnuðu um alla hér í kalda stríðinu, sérstaklega voru þeir róttæku undir smásjánni, enda var það gert að ósk CIA. En svona var þetta bara! Þegar Jón hélt því fram að sími hans væri hleraður eða að hann hefði grun um það, þegar hann var utanríkisráðherra, var ég svo sem ekkert hissa, taldi það bara vera svo að “svona væri þetta bara”. Hann nefndi það ekki í sama viðtali að það væru Sjálfstæðismenn eða einhver leyniþjónusta þeirra, sem stæði á bak við þessar hleranir, heldur erlent ríki. En Íhaldið misskyldi þetta, enda er það nú bara svoleiðis, þeir eiga mjög erfitt að taka illa við gagnrýni, sérstaklega ef það er gagnrýni á herraþjóðina í vestri! En svona er þetta bara! Að halda því fram að Stóra símhleranamálið sé Birni Bjarna að kenna, er sú mesta fásinna sem ég hef heyrt. En viðbrögð hans í þessu máli segir eiginlega meira um hann sjálfan en meintar símhleranir! En svona er Björn bara! Svona er þetta. Sérstaklega þegar Björn er í framboði og SUS hafa gagnrýnt leyniþjónustu-frumvarpið, sem hann ætlar að leggja fram. En svona er þetta bara, sumir þola ekki að á þá sé andað og svo eru það aðrir sem þola ekki að aðrir andmæli stefnu þeirra í frjálshyggjubullinu.
En svona er þetta bara!

Og það besta er í frétt dagsins, er að hvalurinn sem Kristján eyddi ómældu fér í að veiða, var væntanlega sjálfdauð skepna, sem þeir fundu á reki!

Svona er þetta bara!

Tilfinningaverur lítils metnar hjá Frjálshyggjuliðinu

Var að lesa athyglisverða grein um hval-ræðis-málið á Ósýnilegu höndinni og finnst mér höfundur þeirra greina gera heldur lítið úr tilfinningum fólks. Eins og fólk veit og greinir okkur einmitt frá villidýrum, er að við mannfólkið höfum tilfinningar og oft ræðst það af tilfinningum okkar, hvaða afstöðu við tökum til ýmissa mála. Hugsjónafólk er hlaðið tilfinningum, sama hvaða hugsjónir eru þar í gangi og geri ég fastlega ráð fyrir, að greinarhöfundur frjálshyggjunar neiti því ekki að hann sé tilfinningamaður, að hann sé staðfastur á meiningu sinni, hversu vitlaus sem hún kann að vera hverju sinni. Eða er það lenskann hjá frjálshyggjuliðinu að gera lítið úr tilfinngingafólki, bara til að réttlæta einhverja aðra athöfn, sem kannski orkar tvímælis að sé rétt? Þýðir það sem sagt að þeir sem eru á móti hernaðarbölti, miskiptingu auðs og valds, Kárahnjúkavirkjun og þess háttar tilfinningabulli, séu bara tilfinningaverur, sem ættu að halda kjafti og sitja grenjandi út í horni með sitt tissjú, frekar en að vera bera tilfinningar sínar á borð?

Hvað er skoðun annað en tilfinningar?

Hvala-Kristján

Hlustaði á viðtal í gær á RUV þar sem breski sendiherran tjáði sig um væntanlegar hvalveiðar íslendinga. Hann taldi það vera litlir hagmunir í húfi fyrir okkur að fara út í þessar veiðar, bæði vegna markaðsmála og sölu og einnig vegna þess álits eða álitshnekki sem við íslendingar verðum fyrir, þegar veiðar hefjast. Þegar eru nokkrir búnir að senda frá sér mótmæli. Hitt er annað mál að ef og þegar hvalveiðar hefjast, þá mun það skaða ferðamannaiðnað okkar íslendinga g þar erum við að fórna miklum hagsmunum fyrir minni. Ég heyrði einnig viðtal sem tekið var við Kristján "hvala" Loftsson þegar hann koma að landi í Hvalfirði og ég held hreinlega að maðurinn hafi verið illa haldinn af sjóveiki, þegar viðtalið átti sér stað. Hann krafðist þess að sendiherranum yrði vísað úr landi fyrir ummmæli sín í sjónvarpinu, eitthvað í sambandi við meiðandi athugasemdir í sinn garð og vegna hvalveiðanna. Eitthvað í sambandi við það að Kristján hafi bara aldrey heyrt annan eins óhróður áður og það af háttsettum embættismanni eins og sendiherra Breta. Ég var ekki var við að sendiherrann hafi haft meiðandi ummmæli eða óhróður í garð Kristjáns, þrátt fyrir að hann hafi bennt á (samkvæmt sinni skoðun og sjálfsagt annara) að hvalveiðarnar væru mistök. Hann var að segja sína skoðun. Nema kannski sú ábending eða spurning sem sendiherrann varpaði fram, "Hver mundi græða á hvalveiðunum?" Kristján Lofstsson ætti frekar að fara út í arðbærari viðskipti en hvalveiðar, það er mín skoðun, t.d. það væri gargandi markaðssnilld að bjóða ferðamönnum í siglingu á Hvali 9 til að "veiða" hvali á annan hátt og er ég nokkuð viss um að Kristján mun örugglega græða meira á þeim viðskiptum en draga dauð dýr í land.

Og fyrir þessi örfáu skepnur munu hagsmunir okkar íslendinga skaðast miklu meira en hagsmunir Kristjáns í þessu máli og hver ætlar þá að borga brúsan að því tjóni sem verður? Kristján? Ríkisstjórnin eða sjávarúvegráðherra? Nei, örugglega ekki. Að gera bátinn klárann hefur kostað sitt, að viðhalda þessum eignum í Hvalfirði kostar sitt og ef Kristján á skítnóg af peningum, þá er það allt í lagi, hann má spreða þeim eins og hann vill. en ekki á kostnað ferðamannaiðnaðar sem er viðkvæm atvinnugrein hér á og er, samkvæmt síðustu tölum Ferðamálasamtaka, að verða mikil fjölgun á ferðamönnum hingað til lands. Ætlar Kristján að hafa það á samviskunni, er viðkvæmt fólk hættir við að koma til landsins, bara út af hvalveiðum?

Ég bara spyr! 

Kalt úti

Það er kalt úti. Það er kalt í Hvalfirðinum og það er líka kalt á hafnarbakkanum í Reykjavík. Það er kuldi í íhaldinu vegna hlerunarmála, þó að einhver þýða sé komin í málin hjá henni Þorgerði, en þó er líka kuldi hjá sumum út í Jón Baldvin að vera að tjá sig um símhleranir. Mér þykja líka kommarnir á Íslandi vera kaldir að vera óska eftir rannsóknum á meintum símhlerunum í kalda stríðinu og Davíð er svellkaldur þegar hann kemur fram og segist ekkert skilja í fyrrfyrrfyrrverandi utanríkisráðherra að tjá sig svona um grunsemdir sínar. Og svo segja menn að Kalda stríðinu sé lokið!

Lifi kalda byltingin! 

 

Tilvitnanir Björns

Hér má sjá ein ummæli Björns Bjarnasonar um uppgjör Alþingis vegna kalda stríðsins. Þessi grein er tekinn beint úr gagnasafni MBL.is

Innlent | Morgunblaðið | 23.5.2006 | 05:30 Björn Bjarnason dómsmálaráðherra: Hvatt eindregið til uppgjörs Björn Bjarnason dómsmálaráðherra segist hafa hvatt eindregið til þess, bæði innan Alþingis og utan, að uppgjör vegna kalda stríðsins fari fram hér á landi. Sé vilji til þess á Alþingi að rita sögu Íslands og kalda stríðsins megi gera það með sama hætti og gert var þegar saga stjórnarráðsins 1964-2004 var rituð. Um rannsóknar- og greiningarheimildir til lögreglu segir Björn að hann hafi lýst þeirri skoðun á þingi að hann telji ekki lengra gengið að óbreyttu en fram komi í frumvarpi um nýskipan lögregluumdæma. Nánar er rætt við Björn í Morgunblaðinu í dag.

Hér eru ummæli nr. 2

Innlent | mbl.is | 22.5.2006 | 20:31 Björn: Skrýtið að hlusta á gamla sósíalista undrast upplýsingar um símahleranir Björn Bjarnason, dómsmálaráðherra, segir á heimasíðu sinni í dag, að fréttir af erindi Guðna Th. Jóhannessonar, sagnfræðings, um símahleranir í kalda stríðinu hljómi eins og aldrei hafi heyrst um, að símar hafi verið hleraðir á þessum árum. Sérstaklega er skrýtið að hlusta á hina gömlu sósíalista og alþýðubandalagsmenn tala eins og símahleranir komi þeim algjörlega í opna skjöldu. Þeir hömruðu þó á því sýknt og heilagt á þessum árum, að stjórnvöld væru að alltaf að hlera síma. Hafi eitthvað komið þeim á óvart í erindinu væri það líklega, að skiptin eru sex og nákvæmlega tilgreind auk þess sem dómsúrskurður er að sjálfsögðu að baki hverri heimild," segir Björn

Nokkrir kunningjar mínir hafa staðfest að Björn hafi talað um það í fréttaviðtali á RUV að fyrir einhverjum árum, að sóíallistar og gömlu kommarnir yrðu að horfast í augu við þá staðreynd að Sovétríkin væru ekki lengur til og þeir ættu að gera upp fortíð sína sem fyrst. Ef hann vill að uppgjör verði, hversvegna lætur hann þá ekki opna fyrir gögnin í Þjóðskjalasafninu og stuðlar að því að þetta mál verði krufið í kjölinn?

Lifi byltinginn

Ekki sama Björn og Séra Björn?

Einu sinni sagði Björn Bjarnason að Kommúnistar á Íslandi þurftu að gera upp sína fortíð og draga ekkert undan. Mig minnir að þetta hafi verið fljótlega eftir að Múrinn féll og Sovétríkin liðu undir lok. Var hann harðorður í garð kommúnista, sósíalista og almennt alla vinstri menn, sem á einhvern hátt tóku upp hanskann fyrir Sovét og vildu innleiða sósíalið hér á landinu. Sem betur fer fór þó ekki svo að við gerðum það. Að vísu voru til hópar sem voru ekki með inngögngu í Nató og voru þar með kommúnistar, þeir sömu væntanlega voru á móti veru bandaríks her hér á landi og má fullyrða það að finna mátti efahyggjumenn úr ýmsum flokkum. Voru þau mótmæli laminn niður með táragasi á Austurvelli. Ég var t.d. einn af þeim sem vildu bandarískan her, ólst upp við það og taldi að af tvennu illu, væri skárra að hafa Kanann við bæjardyrnar en Kommann. Takið eftir; AF TVENNU ILLU!

Nú þegar sagnfræðingar leggja fram með rökstuðningi að hér hafi farið fram njósnir og símhleranir af stjórnvöldum á árunum 45-75 (+/-) gegn þeim sem voru ekki á sömu skoðun og Íhaldið, rekur Björn Bjarnason upp væl og segir að þingmenn ættu frekar að líta fram á veg en vera að velta sér uppúr fortíðinni og rannsóknir á henni (fortíðinni) ættu að vera í höndum sagnfræðinga! Bíddu við; Ætti Íhaldið ekki gera upp sína fortíð eins og Björn lagði til réttilega að sósialistar ættu að gera? Er maðurinn fæðingarhálviti eða hvað? Eða eru að koma kostningar í vor?

Mikið rétt, það má glögglega sjá á tillögum ríkisstjórnar varðandi lækkunar á vörugjaldi og virðisaukagjaldi á matvæli. Gott mál, en var ekki búið að vera benda þeim á þetta í sl. 2-3 kjörtímabil? Eða var þeta neyðarúrræði vegna þess að Samfylkingin, VG og Frjálslyndir ætluðu að nota matarskattin sem kosingamál? Þá er þetta gott útspil en vonandi sér fólk í gegnum þetta áður en það verður of seint, því að mér skilst að þetta taki ekki gildi fyrr en næsta vor! Tillögurnar eru að vísu ágætar en LÖNGU tímabærar og þessir tillögumeistar ættu að skammast sín að vera ekki búnir að lækka þessa skatta af matvælum fyrir löngu. (Ég sé t.d. ekki neinn mun á Skatti og Gjaldtöku, þegar ríkið er á annað borð að innheimta þetta af okkur)

Lifi byltingin!

Um stjórnmálaskoðun

Það er kannski komin tími til að ég geri grein fyrir þessari endalausu árás á Íhaldið og Framsókn í greinum mínum undanfarið. Málið er að ég kaus Íhaldið hér áður fyrr, þegar flokkuri stóð fyrir slagorðinu, Stétt með stétt! Þá trúði ég því eins og nýju neti að þetta væri málið. Að íhaldsmenn gætu stjórnar verkalýðsfélagi af sama skapi og eldheitir hugsjónamenn. (reyndar er verkalýðshreyfingin hundónýt í dag) Ég trúði því að maðurinn sem var að handflaka fisk í gamla frystihúsinu hér heima ætti eitthvað sameiginlegt með heildsalanum í Reykjavík (eða hvar sem er). Ég trúði því að flokkurinn ætlaði að vernda láglaunamanninn jafnt og hálaunamanninn, trúði því að allir mættu græða. En ég var ungur þá og óþroskaður. Í dag þegar ég heyri Íhaldsmenn segja Stétt með stétt, eins og Sólveig Pétursdóttir sagði í hádegisviðtali, þá fæ ég gubbu! Þetta sem átti að vera Stétt með stétt varð Há-Stétt að troða á Lá-stétt. Ég kaus ekki Íhaldið síðast og var í vafa þar síðast, sá bara enga lausn, nema að skila auðu, en það vildi ég ekki. Vildi ekki gera atkvæði mitt ónýtt með því að skila auðu. Maður væri svo mikill "lúser" ef svo væri og einnig ef maður mætti ekki á kjörstað. Ég kaus Alþýðubanda-Krata-Kvennaflokkinn (heitir víst Samfylking) síðast en geri það ekki aftur. Það er sama með hann og Íhaldið, ég veit ekki hvar ég hef þessa flokka. Áður fyrr var hægt að ganga að því vísu fyrir hverju Íhaldið stóð fyrir, það fór ekkert á milli mála. Einnig var það með Krata og Allaballa, Maður vissi nákvæmlega hvar maður hafði þessa flokka og svo það var mjög auðvelt að vera með eða á móti. Íhaldið í dag er þannig að undir niðri ríkir valdagræðgi, ráðstjórnarkomplexar og stefnan að gera þá ríku ríkari með öllum ráðum. Á yfirborðinu reyna þeir að vera ferlega Feminískir og taka fyrir málefni sem venjulegast eru á miðju eða jafnvel til vinstri á litrófinu, en tekst það herfilega. Það var nefnilega kjánalegt að sjá gamlann íhaldshund eins og Villa sitja með leikskólakrökkum í fanginu í síðustu bæjarstjórnarkostningum, maðurinn sem hefur varla skipt um bleyju á sínum börnum og Gísla Martein sem er jafnvel enn með b....!
Nei, svolítið ankaralegt, finnst mér. Reyndar var það sem gerði útslagið hjá mér varðandi Íhaldið, var þessi gegndarlausa einkavæðingarstefna þeirra, stefna þeirra í fjármálum að menn máttu græða eins og þeim sýndist og á kostnað okkar hinna sem höfðu ekki séns í þetta fjámálarugl. Svo varð það Baugsmálið, Jónsmálið og ljósvakafrumvarpið. Þá fékk ég nóg. Þá sá ég að Íhaldið var að meina allan tímann; Það er allt í lagi að græða, það verða bara að vera réttu mennirnir sem meiga það! Og Baugsfeðgar voru ekki réttu mennirnir og Jón var kjaftfor bisnessmaður sem bara móðgaði Kjartan Valhallargoð, en það mátti engin gera! Allir urðu að vera hlýðnir og gera það sem Davíð og Kjartan sögðu. Það mátti engin hafa sjálfstæða skoðun. Það mátti engin segja neitt sem var í andstöðu við stefnuna eða jafnvel smágagnrýni, þá var sá sami settur út í kuldann eða gerður að sendiherra! Þegar upp er staðið, þá er Íhaldið sami gamli lokaði flokkurinn, illa haldinn að kaldastríðs-komplexum og er það furða þó ég kalli hann Íhaldskomma! Samfylkingin er þó að reyna að vera þessi opni, lýðræðislegi flokkur, en vill kannski ekki viðurkenna mikið mistök sín, s.s. Kárhnjúkavirkjun, en ætti sér viðreisnarvon ef stefna þeirra væri ákveðnari og hætti þessu kjaftæði, eins og virðist vera með Íhaldið, Frjálslyndir urðu til út af einu máli, kvótanum og þeirra akkilesarhæll er að þeir eru hægriflokkur, en meiga eiga það, þeir eru frjálslyndir. Það er aðeins einn flokkur sem maður veit nákvæmlega hvar maður hefur og það eru Vinstri grænir. Stefna þeirra er kristalskýr en maður þarf ekki endilega að vera sammála henni. Þannig að ég geri hreinlega ráð fyrir að kjósa bara Sólskinsflokkinn, ef hann væri i framboði!
Lifi byltingin!

Íhaldskommi eða kommaíhald?

Þá liggur það ljóst fyrir. Þeir sem hafa ekki húmor og eru ekki sammála Íhaldinu í umhverfismálum, utanríkismálum, málefnum aldraðra, fjármálum, skólamálum, stóryðjumálum, kynferðismálum, vegamálum, launamálum, fiskveiðimálum og þessháttar gríni, eru Kommar! Það þýðir, ef þú ert ekki sammála þeim Stóra í einu og öllu og leyfir þér að efast, þá ertu Kommi, ef þú leyfir þér að gagnrýna, þá ertu Kommi. Þetta minnir mig svolítið á stefnu þeirra Kremverja hér áður fyrr, svei mér þá! Nema að þeir eru ekki farnir að flytja menn stórfeldum búferlum Austur á land í þrælabúðir!
En eins og fólk veit og vilja vita, stunduðu Kremlverjar stórfeldann áróður fyrir stefnu sinni og hikuðu ekki við að fremja glæpi til að standa við hana. Sem betur fer leið komúnisminn undir lok, því að hún var óholl mannkyninu það geta allir verið sammála um, líka alhörðustu íhaldsmenn. en stundum finnst mér þögnin, áhugaleysið, virðingaleysið og tilhneiging íhaldsins að leyfa ekki opna umræðu um ýmis mál, jaðra við komúnisma. Þá er það spurningin; Hvort er betra að vera Íhaldskommi eða Kommaíhald, því að báðar þessar stefnur hafa fært mankyninu meiri ófögnuð en gæfu!
Því segi ég enn aftur og stend við það; Lifi byltingin (og það þarf ekki að vera neitt Che og Kúbulegt við það slagorð)

Söguleg endalok!

Þá hefur ríkisstjórn Ísland gert samning við herinn vegna brotthvarf hans af landinu. Geir og Framsóknar-þurs fagna því, stokkbólgnir á hnjám, að herinn ætlar að nota ALLANN sinn herstyrk, ef ráðist verði á landið! Vá, ekki hélt ég að við værum svona merkileg hjá herraþjóðinni fyrr vestan að þeir sendi barasta allann Nato-herstyrk sinn í Evrópu, Atlandshafsflotann og flugher og jafnvel flytja herlið frá Afganistan og Írak, auk heimavarnaliðsins í USA til að verja Ísland! Til hvers voru þeir þá að fara? Hvað sagði eiginlega Geir við þá í samninganefndinni? Hvaða rosa tak hefur hann á Kanann að þeir eru tilbúnir að beita ÖLLUM sínum herstyrk okkur til verndar, ef með þarf? A.m.k. var ekki annað að skilja á Geir í gær, þegar hann og Þursinn kynntu niðurstöðuna í beinni. Reyndar er þessi varnarsamningur svo leynilegur, samkvæmt fréttum gærdagsins, að aðeins tveir vita innihald hans, þ.e. aðeins tveir á Íslandi. Ég geri ráð fyrir að þeir í bandarísku samninganefndinni viti líka innhald samningsins, skárra væri það nú tangarhaldið á Kananum! En það var líka eitt sem ég tók eftir í gær, hvar var Valgerður, utanríkisráðherrann á meðan. Jú að tala Ísl-Ensku í útlöndum, eitthvað sem varðar þróunarhjálp. Henni var sem sagt ekki treystandi til að skrifa undir nein plögg á vegum ríkisstjórnar. Tilviljun að hún skuli vera á erlendis á sama tíma og samningurinn er kynntur? Og hvernig ætla Þeir að ráðstafa svo svæðinu innan "girðingar"? Þeir ætla að taka sér heilt ár til að hugsa málið. Fólk er nefnilega fljótt að gleyma á einu ári. Þeir vilja ekki gera neitt óþægilegt á komandi vetri, vegna kostninga að vori, treysta því að Þeir verði við stjónvöld næsta sumar, nota tímann til að láta gæðinga sína og innmúraða tryggja sér fasteignir og verðmæti. Af hverju ekki strax? Árni Bæjó í Reykjanesbæ var ánægður með samninginn en eitthvað var hann pirraður út í kollega sína að ekki skuli vera búið að gera neinar ráðstafanir um að nýta svæðið, þrátt fyrir fjölmargar tillögur og margar þeirra mjög góðar! Náttúrufræðisafn. Lögregluskóli, Kvennafangelsi, Íbúðir aldraðra, Kvikmyndaver og sfv. Og svo ákvæðið um að hreinsa svæðið. Þar held ég að Kaninn sé að taka okkur í óæðri endann, því að við vitum ekki hversu mikil mengunin er á svæðinu, bara það að við vitum að mengnin er til staðar og það þykir mér miður. Jú, þeir gefa sér 4 ár, en ef ég þekki Íhaldið rétt, þá draga þeir örugglega tærnar alveg framundir það síðasta til að gera eitthvað í málinu og þá verður of seint að láta Kanann standa við sitt og við sitjum uppi með óþverrann, en í staðinn ætlar Kaninn að verja okkur með ÖLLUM sínum herstyrk, EF eitthvað kæmi uppá hjá okkur!
Þetta kalla ég Söguleg endalok!
Lifi byltingin!