exbé=Formúla fyrir nýja tegund af einfrumungum?

Jæja, ekki að spyrja að því, auðvitað tókst minnsta flokknum í landinu að komast í borgarstjórn, ásamt flokki með Vinstra íhaldinu (eða hægri-var dáldið óljóst þarna í restina!) Þetta virðist vera lögmál frekar en tilviljun, en alltaf hefur Framsóknarflokknum tekist að vera meira og minna með puttana í stjórn landsins, alltaf tekst honum að komast í áhrifastöðu í ríkisstjórn og borgarstjón, þrátt fyrir slæglegt gengi, allstaðar þar sem hann kemur því við, nær hann að troða sér, þó svo að langmestur meirihluti þjóðarinnar vilji ekki hafa hann yfir sér! Hvernig stendur á þessu? Kannski vegna þess að hann er galopinn á báða enda og er tilbúinn að fórna hugsjónum (ef einhverjar eru) bara til að fá að stjórna, og Fuglaflokkurinn (XD ef einhver skyldi ekki fatta!) veit alveg að hægt er að kaupa Einfrumingsflokkinn fyrir stól, bara ef hann vill vera memm! Hvað kallast svona stjórnmál? Ég fatta þetta ekki. Enda ættla ég ekki að reyna það, enda búinn að fá nóg af þessum tveim flokkum í stjórn og tími til kominn að skipta þeim út fyrir lýðræðið.

Ian Andersson

Var að koma af mögnuðum tónleikum með gömlu kempunni úr Jethro Tull, Ian Anderson. Tónleikarnir voru hreint frábærir, mjög eyrna og heyrnavænir. Kappinn tók marga af helstu smellum sínum í klassískri útsetningu sem tókst mjög vel. Meira að segja guttarnir mínir, 14 og 16 ára áttu vart orð af hrifningu yfir tónleikunum, sem segir eiginlega hvað Ian og tónlist hans höfðar til margra í dag. Ég kynnist þessari tónlist með laginu Aqualung, eins og flestir geri ég ráð fyrir, en fór smátt og smatt að hlusta á meira eftir hann, þó að ég hafi aldrei lagst í mikla plötusöfnum frá hljómsveitinni. Reyndar eignaðist ég vinilsafn með hljómsveitinni, en þá var CD væðingin að byrja og ég átti ekki plötuspilara, sem var í lagi. Plöturnar rykfalla því í skáp. Með Ian í kvöld spiluðu félagar úr Symfóníu Íslands og einstaklingar, sem hann spilar með þetta prógram, sonur hans spilar á trommur m.a.
Það varð allt vitlaust í höllinni þegar lokalagið var flutt, Locomotive Breath. Kappin var svo með marga góða brandara á milli laga og skemmtilega útúrsnúninga. Fiðluleikarinn ungi, Lucia Micarelli, lék með honum á tónleikunum á fiðlu og var Ian að kynna lagið; "She is like a Swallow" en sagði þess í stað; She´s like to swollow"! við mikla kátínu tónleikagesta.
Ef ég ber saman þessa tónleika við þá sem voru á Skaganum ´92, naut ég þessa tónleika mun betur. Ég var að minnsta kosti ennþá með góða heyrn þegar ég og fjölskylda mín labbaði út í "haustkuldann" á leið heim.
Frábær skemmtun.

DaVinci code

Ég á alveg eftir að sjá þessa mynd, hef heyrt að hún sé bara nokkuð góð þótt hún sé ekki eins góð og bókin. Þegar ég las bókina, má segja, eins og vinkona mín orðaði það, að maður varð hreinlega öryrki á meðan, það varð ekkert úr verki hjá manni, las fram á nótt, las þegar maður kom heim úr vinnu, las eftir mat og las svo meira þegar komið var uppí rúm, gerði sem sagt ekkert annað en að lesa! annað eins gerðist þegar Englar og djöflar var tekin spjaldanna á milli, las bókina á tveim sólarhringum eða svo. Reyndar var það spennan sem hélt mér við lesturinn, ekki endilega plottið um Jesú og Maríu, ég lít á þessar bókmenntir bara sem skemmtilega skáldsögu, þó að hugmyndin sé góð, þ.e.a.s. þetta með Jesú og Maríu. Eins og fólk veit þegar, þá áttu þau, samkvæmt bókinni, að eiga barn saman og náði María og barnið að flýja til Frakklands og þar séu Mervíkingar afkomendur þeirra. Skemmtilegt. Var það ekki í Matrix einmitt stafræn persóna sem var kallaður Mervíkingurinn? Bara pæling.

Kosningavor

Jæja, það styttist í kosningar þetta vorið. Menn eru í óðaönn að mynda sér skoðun, endurnýja skoðun sína eða hreinlega að ákveða að hafa enga skoðun! X-D hamast við að tala sem minnst, X-Bé hamast við að lofa einhverju sem þeir geta ekki staðið við, X-S hamast við að halda meirihluta í REK og annarstaðar, X-V hamast við að skammast út í alla, X-F hamast barasta ekki neitt, því að engin veit fyrir hverju þeir eru að hamast yfir höfuð! Nema kannski að halda flugbrautinni í Vantsmýrinni. En hvað er ég að skipta mér af bæjarpólitíkinni í henni Reykjavík, kýs ekki einu sinni þar! Hef nóg með það þar sem ég er búsettur, enda allt á fullu hér í Garðinum, aðeins tveir listar í boði og eru blessunarlega lausir við að tengjast D, B, S, V, F osfv. á nokkurn hátt, allavega ekki opinberlega.
Munið bara að kjósa eftir ykkar bestu samvisku.
Góðar stundir.

Logn og blíða og "m-álæði"

Flott þetta nýja þema! Rembrant. Hentar vel svona listakalli eins og mér og hlakka til að fá fleirri afbrigði af þessu í framtíðinni.

Þrátt fyrir þessi fyrstu orð, á fer þessi færsla á Stjórnmál og samfélag, eðlilega, enda að styttast í kostningar. Sá þáttinn á stöð tvö í gær, "Slegið í klárinn" eina og Sigmundur Ernir kallar það, og það má eiginlega segja að hrossið hafði verið hreinlega slegið niður, ef menn eru staddir annar staðar en á línu Sjálfstæðisflokksins í Reykjanesbæ. Annað eins hefur nú ekki sést barasta síðan olían fraus hér um árið! Reyndar mátti hann eiga það, bæjarstjórinn, að hann minntist nú á það að fyrra bragði að það væri eiginlega ekki að marka þessa spá, þrír smáflokkar voru hreinlega ekki komnir á koppin, þegar þessi spá var gerð og A-listinn afsakar sig með því að segja að stefnulistinn (loforðalistinn) hefur ekki verið birtur. Hm. Mig minnir að hann hafi verið kominn fram þetta framboð Samfylkingar og Framsóknar fyrir meir en mánuði síðan. Hvers vegna var ekki stefnuskráin komin í ljós fyrr? Engin skipstjóri leggur úr höfn nema vita hvert hann ætlar að fara og hvað hann ætlar að gera. Ekki góð byrjun það hjá annars ágæta lista. Vonandi verða þessar tölur ekki til að draga úr mönnum kjarkinn, því að enn er langt í kostningar og margt getur gerst á þrem vikum, þó svo að litlu listarnir nái ekki að velta Árna úr stólnum, en þeir eiga eftir að rétta úr kútnum, alla vega A-listin og Vinstri grænir, það er nokkuð öruggt. Reyndar hefur Reynir tekið þarna stóran séns að setja sig á 6 eða 7 sæti, full mikil bjartsýni þykir mér, því að ekki geri ég ráð fyrir að A-listinn fái svo marga, mesta lagi 2 og í besta falli 3. Vinstri gærnir koma sterkir inn, hafa reyndar aldrei boðið áður fram til sveitastjórnar í Reykjanesbæ, eða ekki síðan að Allaballar voru og hétu. Það var eitt atriði sem ég tók eftir hjá Sigurði Eyberg, "Ekkert álver, takk fyrir". Nýjan vinklil - Aðra sýn!. Flott, ánægður með hann, leggja frekar áherslu á ferðamál, en eitthvert F*****G monster við bæjardyrnar, þó að það gefi eitthvað í aðra hönd í smá tíma, þá á það eftir að koma í bakið á okkur. Eða erum við íslendingar mikið að fara á staði erlendis þar sem stórar verksmiðjur eru, kjarnorkuver og þessháttar mannvirki eru staðsett, (ekki nema einhverjir verkfræðingar kannski)? Nei, það er sól, náttúra og að græða peninga. Málið er að Suðurnesin hafa sól, (stundum falin á bak við ský) sérstaka náttúru, heillandi hugmyndir fyrir ferðamenn og fólk sem sér lengra fram í tíman í ferðamálum, sem er umhverfisvænn iðnaður sem ALLIR njóta góðs af og á eftir að skila til svæðisins mun meiri pening en álver. Þ.e., fjámagnið verður þá a.m.k. eftir á svæðinu, ekki satt?

Góðar stundir.

Síðasta kvöldmáltíðin

Sjálfsagt veltir einhver því fyrir sér hversvegna þessi þráður skuli vera undir flokknum Vísindi og fræði. Mig skal ekki undra það. Ég hefði verið það líka. Mál eru þannig með vexti að ég er að fara að borða síðustu kvöldmáltíðina með útskriftarnemum FS í kvöld! Þá hafið þið það. Þarna er þá tengingin komin, þetta er vísindalega úthugsað, þau eru búin að nema fræðin og innan FS er það kallað Síðasta kvöldmáltíðin, vegna þess að þar eru kennarar og nemendur að kveðja hvort annað, jafnvel í síðasta sinn. Alltaf jafn gaman á þessum kvöldum, við kennarar sitjum til borð ásamt nemendum, etum og drekkum gos eða vatn, flytjum kveðjusöng kennara og hlustum á þeirra kveðjusöng og skemmtiatriði frá þeim. Uppúr miðnætti fara kennarar að hverfa heim á leið en nemendur og einhverjar eftirlegukindur skemmta sér eitthvað fram á nótt. Ég ætla heim á miðnætti!

Sumar og sól

Jæja, þá er bara að koma sumar og sól með blóm í haga og allt, flensufuglarnir farnir að vappa í heiðinni, garðeigendur klippa tré sem óðir væru og snurfusa hjá sér ytri híbýli fyrir sumarið. Prófin að byrja með tilheyrandi prófskrekk og skemmtilegheitum, dimmetering út um borg og bý, þar sem sjá má oft skrautlega búninga og oft kostulegar sýningar þar sem framhaldskólanemendur gera góðlátlegt grín af kennurum sínum. Sjálfsagt eru margir farnir að skipuleggja hjá sér sumarfríið, eflaust margir búnir að því fyrir löngu, þeir sem vilja flakka um sveitr landsins búin að ákveða hvert á að fara þetta árið, vestur, norður, austur og lengra austur (sko, fyrir þá sem búa á Reykjanesskaganum fara nefnilega ekki í suður, nema með flugi) Tjaldvagnar og  fellihýsi dregin fram og viðruð, sílíkomsprautuð, sumarbústaðir teknir á leigu eða að fólk flytur búferlaflutningum í sumarbústaði sína, þeir sem þá eiga. Hinir halda í víking, sólarferðir, (aldrey skilið hversvegna íslendingar fara til sólarlanda á besta tíma ársins á landinu bláa) rútuferðir um Evrópu eða Kananda, eða styttri ferðir til norðurlanda og langar ferðir á framandi slóðir. Landinn er hreinlega alltaf á ferðinni, stoppar aldrei, eins og krían, stoppar stutt við á hverjum stað, svo er flogið upp. Ég held þó að margir hugsi sér tvisvar um, þegar ákveðið er að keyra um sveitirnar, bensínverð fer hækkandi og hefur hækkað nóg síðustu vikur, það verður dýrara að keyra sömu vegalengd en í fyrra. En hvort að hækkandi bensínverð hafi einhver áhryf á þetta veit ég ekki. Hingað til hafa íslendingar látið sem ekkert væri og tekið öllum hækkunum þegjandi og hugsa að þetta sé gjaldið fyrir að búa á Íslandi. Ekki ætla ég að fjasa meira út af því, ætla að halda mér heima við í sumar, því heima er best, að vísu á að þvælast með mig til Danmerkur í sumar í heimsókn og allt í lagi með það, en flakk um landið læt ég eiga sig alfarið þetta árið, mesta lagi ein ferð í sveitina til mömmu og læt þar við sitja.

Gleðilegt sumar og farið varlega í umferðinni.

Götóttar götur í KEF!

Sá það á vef VF í gær eða fyrradag, að margir KEF-víkingar séu orðnir langþreyttir á vegaleysunni á Hingbrautinni og var þá orð í tíma töluð. Ekki er ég hissa á því! Ef maður myndi nú samanburðarmerki á milli stjórnunar bæjarins og lagfæringar á götum bæjarins, væri útkoman sú, að stjórnunin væri álíka götótt og göturnar í KEF! Má þar benda á marga vegaspotta í þeim góða bæ, sem mætti fyrir löngu vera búið að lagfæra, ekki bara Hringbrautina, heldur lagfæringar á gamla Flugvallarvegi (Nikkel) og malarkaflann frá Húsasmiðju og uppá Reykjanesbraut, sem er eins og argasti afdala-sveitarvegur eða þaðan af verri! Með allri virðingu fyrir sveitum landsins! Og nú á að setja hringtorg á mótum Aðalgötu og Iðavalla og lokast þá þarna aðalinnakstur í bæinn frá FLE, Sandgerði og Garði á meðan eða í viku, því ekki er ástandið á gamla Þrætukaflanum við Gróf neitt betra!
Stundum hvarflar það að manni að öll þessi jeppaeign sé ástæðan, það sé bara stefnan að hafa að minnsta kosti 30% gatna í hverju bæjarfélagi svona götóttar, til að jeppafólkið fái nú að reyna bílana, eða hvað? Ég var á ferðinni á Hringbraut í vikunni, sem ég þarf að aka daglega vinnunar vegna, í mikilli rigningu og slyddu, fræsingarnar yfirfullar af vatni og BANG! Svei mér þá, ég hélt hreinlega að annað framdekkið væri komið í hönk hjá mér því að í einni fræsingunni var engin smá hola og auðvitað ekki séns á að sneiða framhjá, bíll á móti og bíllar í bílastæðum.
Ég hélt að það væri nú ekkert mál að troða malbiki á götuna jafnóðum og búið er að fræsa, í stað þess að treysta á góða veðrið, því eins og menn vita, þá er víst ekki hægt að leggja malbik í mikilli bleytu. Og tímasetningin, maður! Byrja að fræsa rétt fyrir páska og enn eru göturnar götóttar. Í morgun búið að loka kafla á Hringbrautinni og umferðinni beint á nærliggjandi íbúðagötur. Hvað skildi það standa lengi yfir?

Mér finnst að ef það á að setja hringtorg á gatnamótin Aðalgötu og Iðavalla, að það yrði að minnsta kosti lagaður kaflinn þarna við Húsasmiðjuna, svo að hægt væri að beina umferð inná þann veg á meðan. Þetta næ ekki nokkurri átt fyrirkomulagið á gatnamálum í KEF þessa dagana, kannski fólk verður búið að gleyma þessu daginn fyrir kostningar, hver veit?

Evran-Krónan?

Í þó nokkurn tíma hafa menn verið að velta því fyrir sér hvort að heppilegt sé fyrir íslendinga að ganga í Evrópusambandið og taka þar með upp Evruna sem gjaldmiðil. Hafa komið fram rök með og á móti. Þeir sem helst eru á móti, segja að þá missa íslendingar sjálfstæði sitt og krónuna. Hinir vilja meina að með inngöngu væru íslendingar orðnir samhliða Evrópubúum hvað lífskjör varðar og það verði jafnræði á milli þjóðanna. Að vísu opnuðust markaðir, innflutningur á kjeti og öðrum landbúnaðarvörum myndi aukast og verð lækka. Þeir sem mæla þessu mót nota hræðsluáróður og bera fyrir sig sjúkdóma og annan ófögnuð og það komi ekki til greina að leyfa óheftann innflutning, slíkt myndi skaða íslenskann landbúnað. OK, hvað er íslenskur landbúnaður? Lambaket? Grænmeti? Ull? Hm, laxaeldi? Þetta er bara tittlingaskítur miðað við það sem verið er að framleiða í kringum okkur. Vissulega eru þetta úrvalsvörur, ekki dreg ég það í efa, en dýr er Hafliði allur, ef eingögnu ætti að styðjast við innlenda framleiðslu. Hver man ekki eftir styrkjakerfinu, kjöt- og smjörfjallinu fræga, sem var að leggja skútuna á hliðina, vegna þess að gamlir framsóknarmenn voru að verja hagsmuni örfárra manna í þjóðfélaginu, landinn varð bara að éta það sem að þeim var rétt. Og verðbólguna?

Ég er nokkuð viss um að íslendingar væru betur settir ef gegnið væri í ESS og Evran væri okkar gjaldmiðill, það er margt sem myndi ávinnast með því. Fyrir það fyrsta væri það stöðuleikinn, þessi sem Haldór og félagar eru alltaf að tala um, nema að það væri meiri stöðuleiki fyrir almenning, ekki bara nokkra vel valda úr þjóðfélaginu. Einnig ætti að leggja niður verðtryggingu lána og samræma vexti við það sem er í nágrannalöndum okkar. Síðasta gegnisfall krónunnar hafði það í för með sér að almennur lánagreiðandi tapar stórfé, sérstaklega vegna þeirrar stefnu að bjóða uppá 100% lán til íbúðarkaupa, hin gengdarlausu útlán bankanna varð til þess að þjóðin er meira skuldsett en áður.
Afnám verðtryggingar lána yrði mesta launabót, sem við gætum fengið, hinir sem eiga peningana eru hvort sem er farnir með þá alla úr landi, kvótin í eigu örfárra einstaklinga, svo að ekki myndi það skipta sköpun. Það er sama hvert litið er, allstaðar er verið að láta okkur borga allt of mikið fyrir allt, mat, bensín, bíla, varahluti og fatnað.

Olía - Kjarnorka - Vetni

Jæja, enn heldur olían að hækka! Flott væri ef maður ætti nú eins og eina olíudælustöð, eitthvað hlítur að detta í kassann hjá þeim að seðlum þessa dagana. Fatið að stefna í 74 dollara og hefur ekki hækkað eins mikið á jafn stuttum tíma í langan tíma. Allt vegna þess að "Goggi Witlausi Runni" hótar að sprengja allt og alla (Allah) til fjandans, ef ekki er farið eftir óskum og kröfum kanans. Þeir láta svona sem halda að þeir eigi heiminn skuldlausann. Það kæmi mér ekki á óvart að Runni yrði þekktur fyrir það eitt á spjöldum sögunar hafa beitt kjarnorkuvopni á friðartímum á aðra þjóð, sem er að reyna að búa til raforku handa þjóð sinni. Alla vega hefur ekkert annað komið ljós en að Íranir ætli sér að framleiða rafmagn, en ekki vopn. Vonandi er það einlægur vilji þeirra að framleiða rafmagn en ekki vopn, en væri það þá ekki til að nota það sem fælingarmátt, eins og Kaninn og Rússinn hefur gert s.l. 50 ár? Væri ekki nær að Kaninn drægi heri sína til baka frá Mið-Austurlöndum, hætti að "bögga" muslimskar þjóðir og standi fyrir því að finna og þróa nýjan orkugjafa. Staðreyndin er sú að mestu orkusóarar veraldar eru bandríkjamenn og það eina sem þeir eru að gera með þessu brölti sínu er að tryggja það að þeir geti verið þar í fremstu röð áfram! er það furða að muslimar séu illir út í bandaríkjamenn út af þessu.

Einhverstaðar las ég það að menn hafi verið búnir að þróa aðferð til að framleiða orkugjafa fyrir bíla um 1950, en olíurisarnir hafi gert allt til að standa í vegi fyrir þeirri þróun. Leiðréttið mig þeir sem vita betur. Íslendingar hafa verið einmitt verið að skoða leiðir til að nota vetni á bíla, má vera að gangi upp, en framleiðsla á vetni kallar á mikla raforku. Einnig hafa tilraunir með alkóhól gefist ágætlega og tilraunir með rafmagnsbíla ganga ágætlega.

Hverjir græða á stríði? Ef ég ætti vopnaverksmiðju, já, annars tapa allir, þegar til lengri tíma er litið. Vestrænar þjóðir hafa átt í stíði sín á milli s.l. 1000 ár og munu með sama áframhaldi og sama hugsunarhætti, hlada því áfram næstu 1000 árin, ef við verðum þá ekki búin að eyða þessari menningu okkar með fíflaskapi. Við vitum að stórveldi rísa og falla og ég hef það einhvern vegin á tilfinningunni að USA sé einmitt það stórveldi sem á eftir innan fárra ára eða áratuga, eftir að falla og verður það fall mikið og afdrifaríkt fyrir okkur öll, hvar sem er í heiminum við svo sem búum.