Er Hoover-ismi í gangi?

Allflest ykkar sem eru komin yfir fertugt, kannast við J. Edgar Hoover, sem var fyrsti forstjóri FBI í USA. Þá ætti sama fólk að muna eða kannast við hvernig hann stjórnaði fyrirtækinu/stofnuninni. Hoover var gallharður kapítalisti, sá kommúnista í hverju horni (eins og McCarty) og Hoover vildi fylgjast  vel með "óvinum" sínum jafnt sem "vinum". Reyndar var það nú þannig að hann hafði það að áhugamáli að safna miður góðum upplýsingum um óvini sína jafnt sem vini. Þetta þekktu allir, sem umgengust hann, að það var best að samþykkja allt sem hann lagði fram, því annars væri hætt á því að Hoover "læki" upplýsingum til fjölmiðla, sem gæti komið viðkomandi í koll, hvort sem ásökunin væri rétt eða login. Ef einhver vogaði sér að mótmæla eða gagnrýna hann (Hoover) tók hann viðkomandi á teppið og sýndi honum ljósmyndir eða önnur gögn, sem gátu komið gagnrýnandanum um koll, nema hann hætti eða dragi umfjöllun sína til baka, jafnvel segði af sér og þar fram eftir götunum. Þannig tókst honum að halda allri gagnrýni niðri, kom sínum málefnum fram án þess að nokkur þingmaður USA, stórforstjóri fyrirtækja, einstaklingar og mafíósar og jafnvel forsetar gátu rönd við reyst. Jafnvel hafa þær sögusagnir verið á kreiki að hann ætti jafnvel þátt í hvarfi Hoffa, verkalýðfrömuð í Bandaríkjunum. Þó svo að aðeins helmingur af þessum sögum um Hoover er sannur, þá má sjá hér gott dæmi um mjög mikla spillingu í einni stærstu stofnun USA. En það verður hver og einn að meta með sjálfum sér.

Ég rakst á þessa frétt hjá vefmiðli einum og fannst mér nú eima svolítið af þessum "Hoover-isma" sem ég er að benda á. Þarna eru greinilega menn úr innsta hring stjórnmálaflokks að "segja" mönnum hvað þeir ættu að gera og segja, og það við dagblað sem lengi var helsta málgagn sama flokks.
Þegar ég hlustaði á seðlabankastjóra um daginn að gangrýna og sverja af sér ábyrgð, orðaði hann eitthvað á þá leið að hann vissi um samtöl og aðgerðir manna, sem olli hruni bankana, en kláraði aldrei að segja hvað hann var að meina né nefndi nein nöfn, fannst mér Hoover vera mættur aftur fram á sjónarsviðið, nema að hér var skrípamynd af honum í pontu sem "þóttist" vita ýmislegt en ætlaði að nota það seinna, þegar það hentaði honum. Þessi umsögn hans Davíðs var nefnilega ekki til þess fallin að upplýsa eitt né neitt, við vissum þetta svosem fyrir, heldur var hann að leika hérna leik til að láta "vini og óvini" sína vita að hann lægi á upplýsingum, sem gætu komið mönnum um koll.

Ég vildi bara tjá mig um þetta atriði og bið fólk um að íhuga hvort að hér hafi ekki ríkt spilling í stjórnkerfinu síðan lýðveldið var stofnað og verið einna mest sl. 20 ár.
Eins og ég fjallaði um í einni færslu minni fyrir ca. tveim árum, þá fullyrti ég það að Íslandi væri stjórnað eins og deild Mafíunnar í hverfi á Manhattan og forsætisráðherrann hét Don Davíð!
Nema að hér er það "löglegt" en siðlaust!

 

Föstudagsblogg

Æ, ósköp eru nú þessir dagar tilbreytingalausir orðnir. Ekkert að gerast frekar en venjulega. Maður nennir varla að lesa Moggann á morgnana og örugglega ekki Fréttablaðið (enda ekki borið út í hverfinu), sömu fréttirnar í útvarpinu af stjórninni og þá aðallega hvað þeir eru ekki að gera og fréttir á RUV og Stöð2 orðnar lélegt klón af sjálfum sér frá vikunni sem leið! Þar til í dag!
Íhaldið ætlar að flýta landsfundi og taka ESB til umræðu! Klappi klappi klapp! Og það þurfti beina útsendingu í sjónvarpinu og útvarpi til að tilkynna það! Eins og ein lítil fréttatilkynning hefði ekki dugað. Nei, það þurfti flugeldasýningu til að sýna þjóðinni hversu framfarasinnaður og opinn Sjálfstæðisflokkurinn er orðinn! Ræt!
Allt í lagi, kannski kemur eitthvað út úr þessu hjá þeim í janúar, en kannski ekki neitt. Ég held þó að flokkurinn varð hreinlega að spila þessu spili út, til að fá smá frið, ólgan er orðin þvílík innan flokksins að menn eru skíthræddir við að hann klofnaði, ekki bara í tvennt, heldur í þrennt. Þeir sem styðja Davíð og vilja enga ESB umræðu né inngöngu og halda þjóðinni í klafa þrælslundar og ánauðar; þeir sem styðja Geir sem vill ESB umræðu en kannski ekki endilega inngöngu, bara til að vera ekki sammála fylgisarmi Davíðs; og þeir sem hreinlega vilja ganga í ESB, losna við Dabba og Geir, taka upp Evru og hætta þessum andskotans útkjálka hugsunarhætti.Vonandi ber þeim gæfu að taka rétta ákvörðun, þjóðinni til heilla, en ekki örfoka Engeyjar- og Viðeyjarættum, sem hugsa bara um eitt og það er að hugsa um eigin hag og engan annan.

Jæja, það er bara föstudagur og það sem Geir og Solla voru að tilkynna þjóðinni dag, kemur vonandi einhverjum fjölskyldum til góða, en þessar ákvarðanir breyta engu fyrir mig og fjölskyldu mína. Ég skulda en stend í skilum (ennþá). Það sem ég er að bíða eftir að gjaldeyrismálin fara í gang, fasteignamarkaður fari í gang, að hjól atvinnulífsins fari í gang aftur og hægt verði að fara að byggja upp nýtt þjóðfélag, laust við eiginhagsmunapot fyrir sérhagmunahópa, leggja krónunni og taka upp trúverðugan gjaldmiðil og efla aftur trúverðugleika Íslands út á við. Pælið íði, fólk. Það voru örfáir sjálfskipaðir vitleysingar sem eru búin að eyðileggja orðstír landsins með græðgi og grunnhyggni.

Góða helgi.

Smá dæmisaga vegna hinnar svokölluðu "kreppu"

Íslensk kona hefur verið að styrkja námsmann í Uganda sem "óvænt varð á vegi hennar" eins og hún orðaði það. Hann var búinn að lofa að senda henni einkunnirnar sínar sem hann og gerði þegar þar að kom. Þar kom fram að hann hafði fengið A í öllum fögum og góða umsögn að auki. Það var nefnilega búið að gera honum ljóst að góður árangur væri lykillinn að því að hann fengi áframhaldandi styrk.

En allt er breytingum undirorpið í henni veröld og ýmislegt getur vissulega haft áhrif á afkomu Frónbúans og getu hans til að láta gott af sér leiða. Hún var að velta því fyrir sér hvort rétt væri að reyna að segja honum frá gangi mála hér á landi, þ.e. kreppunni og öllu því. Og það gæti því miður reynst nauðsynlegt að skera eitthvað niður styrkinn vegna hins breytta ástands hérna megin. Það eru nefnilega tiltölulega litlar líkur á því að fréttir af Íslenska skipbrotinu hafi borist alla leið til hans þarna í Entebbe. Og svo er alls ekki víst að hann skilji alvöru málsins á sama hátt og við hér heima. En ef reynt væri að útskýra hið Íslenska kreppuástand fyrir honum sem virðist ætla að fara langt með að sliga þjóðina einhver þó nokkur ár inn í framtíðina, gæti það samtal orðið á eftirfarandi nótum.



*Heyrðu félagi, það er úr vöndu að ráða. Íslenska þjóðin er gjaldþrota!

Hvað segirðu, en leiðinlegt að heyra, eigið þið þá ekki fyrir baunum og maís?

*Jú reyndar eru búðir fullar af mat og enginn vöruskortur.

Hvað segirðu, þið eigið þá mat. Það er gott. En eigið þiðþá ekki þak yfir höfuðið lengur!

*Jú við eigum reyndar íbúð eins og flestir og það eru fáir heimilislausir á Íslandi.

En hvað segirðu mér þá? Gengur plága yfir landið, eru allir veikir og heilbrigðiskerfið lamað?

*Nei nei reyndar ekki, við fáum nánast ókeypis læknaþjónustu og erum með ágætt heilbrigðiskerfi.

Nú jæja. Það var gott að heyra. En eru þá skólarnir að loka og fá kannski ekki allir tækifæri til að læra að lesa lengur og sérstaklega þá ekki konur.

*Jú reyndar er 99,9% læsi á Íslandi og menntakerfið er ágætt, margir með háskólagráður og konur ekki síður en karlar.

Það er nú gott, en þið verðið þá að passa er að lenda ekki í stríði við nágrannaþjóðir ykkar.

*Uuuu við erum reyndar ekki með her og teljumst nú frekar friðsæl þjóð. En við þurfum bara að hlusta á bullið og stríðsyfirlýsingarnar í fíflinu honum Gordon Brown. Það er það sem við munum líklega komst næst því að fara í stríð.

Ok. Segðu mér nú samt ekki að þið komist ekki í hreint vatn.

*Við eigum reyndar besta vatn í heimi.

Nú, er vegakerfið þá ónýtt? Hérna í Afríku ganga allir eða nota asna og stundum reiðhjól. Það eru líka til strætisvagnar hérna, en þeir eru alltaf yfirfullir.
Eru kannski strætóarnir hjá ykkur hættir að ganga?

*Neeee... Það er verið að ræða um hvort almenningssamgöngur hér eigi að vera ókeypis, en það eru flestallir vegir malbikaðir og næstum allir eru á nýlegum bílum.

Eigið þið þá enga peninga til að gera ykkur glaðan dag? Ég meina, þú sagðir að þjóðin væri gjaldþrota.

*Flestir eiga reyndar einhvern sparnað á bókum þó sumir hafi tapað honum eða hluta hans síðustu daga. Það verður alla vega erfitt að kaupa stærri flatskjái og utanlandsferðunum verður að fækka.

Já, ég á kannski einhvern tíma eftir að fara til útlanda, en ég er nú líka frá Uganda. Hefur kannski enginn vinnu og þurfið þið núna öll að betla?

*Neiiij...! Atvinnuleysið er um 2% en við verðum að flytja Pólverjana aftur heim og fara sjálf að vinna vinnuna sem þeir unnu.

Hmmm... Svo þið hafið peninga, mat, húsaskjól, heilbrigðiskerfi, menntakerfi, búið við frið, eigið nóg hreint vatn og samgöngur eru góðar.
Segðu mér, hvert var vandamálið aftur?



Eftir þessar vangaveltur um aðstæður okkar hérna uppi á skerinu og þetta ímyndaða samtal, ákvað hún að vera ekki að íþyngja honum með ræfilslegum áhyggjum sínum af "gjaldþrota" eyríki norður í ballarhafi. Námsgjöld hans skulu greidd hér eftir sem hingað til og kannski fær hann líka smá vasapening með. Hann getur þá kannski tekið strætó í skólann endrum og sinnum í stað þess að þurfa ganga í marga klukkutíma eins og venjulega. Fé hins meinta íslenska terrorista yrði þá líklega bara vel varið.

Um stefnu Sjálfstæðisflokksins

Björn Bjarnason segir að það sé ekki á stefnu Sjálfstæðisflokksins að ganga í ESB. Það er alveg rétt hjá honum og er ekki oft sem ég er sammála manninum, ekki að við ættum ekki að ganga í ESB, heldur varðandi stefnuna. Þeir tönglast alltaf á því Björn og Íhaldið, að hlutirnir séu ekki á stefnu sinni, vegna þess að þeir tóku einhvern tímann ákvörðun um þau mál fyrir löngu að hafa það ekki á stefnu sinni og þar við situr. Nú vitum við að hinn íhaldsflokkurinn, Framsókn, er nú heldur betur búinn að skipta um skoðun frá því síðast, því að þeir vilja nú ólmir sækja um aðild, allavega tala þeir fyrir því að íslendingar ættu að sækja um og hefja umræður um aðild. Það kalla ég að breyta skoðun sinni og stefnu. Sjálfstæðisflokkurinn er með svo grjótneglda stefnuskrá, að það jaðrar við guðlast að gera einhverjar breytingar á henni, sama hve vitlaus stefnan er. Þessari stífni væri hægt að lýsa á þann hátt að ef maður kemur að löngum og háum vegg, þá myndi sjálfstæðismaður frekar ganga á vegginn, aftur og aftur, frekar en að breyta gönguleið sinni til að komast fram hjá veggnum. Bara vegna þess að hann ætlaði að halda þessari stefnu, sama hvað á gengi!
Það má vel vera að akkúrat núna í dag, sé ekki heppilegt fyrir íslendinga að fara í þessar viðræður, eins og ástandið er í landinu og ég segi í landinu, því að ég er farinn að sjá að þessi vandi er að mörgu leiti innanlandsvandi. Nei, við sækjum bara um á morgun, ekki í dag. Í dag þurfum við að koma á stöðuleika aftur, koma atvinulífinu í gang á nýjan leik, lækka verðbólgu og vexti og afnema verðtryggingu. Endurskipuleggja stjórnkerfið þannig að sé útilokað að sjálfskipaðir lordar geti "átt" landið skuldlaust og vilja svo ekki bera ábyrgð á eigin gerðum (hér á ég við embættismenn ríkisins, seðlabanka, stjórnmálamenn og aðra "víkinga"). Hér þarf að hafa stjórnkerfið gegnsætt og lýðræðislegt og að menn beri ábyrgð á sínum gjörðum. Það er nefnilega ofboðslega fyndið að fletta upp gömlum blöðum og lesa réttlætingu fyrir því að lykilmenn séu með svona há laun er að þeir beri svo mikla ábyrgð. Ja hérna! Þeir keppast um þetta þverann og endilangan að þetta væri ekki  þeim að kenna, heldur einhverjum öðrum.

ég er sannfærður um það að ef íslendingar hafi verið í ESB væri ekki þetta hrikalega vandamál svona stórt hjá okkur mörlandanum eins og raunin er. Það hefði jú komið upp einhver vandamál, ekki efa ég það, sjálfsagt sú menn fyrir sér eitthvert atvinnuleysi, ekki ætla ég að gera lítið úr því, en hvernig lítur þetta út fyrir okkur núna? Andvana og rotin króna, verðbólga ríkur upp úr öllu valdi, virðing lands og þjóðar ekki meir en afturendi á dauðri hænu og stefnir í mikið atvinnuleysi, mun meira og erfiðara en ef við værum í ESB.

Þess vegna ættu Björn B og hinir að fara að huga að því að ganga meðfram þessum langa vegg, eða í besta falli að brjóta hann niður og breyta afstöðu sinni og fara að vinna í því að sækja um inngöngu. Það er eina leiðin til þess að íslendingar geti haldið haus í framtíðinni. Kostir og gallar? Ræðum um það seinna.

Góður!

... útskýrð á einfaldan hátt, með kúm.

SÓSÍALISMI
Þú átt 2 kýr.
Þú gefur nágranna þínum aðra þeirra.

KOMMÚNISMI
Þú átt 2 kýr.
Ríkið tekur þær báðar og gefur þér mjólk.

FASISMI
Þú átt 2 kýr.
Ríkið tekur þær báðar og selur þér mjólk.

NASISMI
Þú átt 2 kýr.
Ríkið tekur þær báðar...og skýtur þig svo.

SKRIFRÆÐI
Þú átt 2 kýr.
Ríkið tekur þær báðar, skýtur aðra þeirra, mjólkar hina og hellir svo allri mjólkinni.

HEFÐBUNDINN KAPITALISMI
Þú átt 2 kýr.
Þú selur aðra þeirra og kaupir naut. Þú stofnar kúabú og hagnast vel. Þú selur síðan kúabúið og sest í helgan stein og lifir á fjármagnstekjunum.

SÚRREALISMI
Þú átt 2 gíraffa.
Ríkið krefst þess að þú farir í harmonikkunám.

BANDARÍSKT STÓRFYRIRTÆKI
Þú átt 2 kýr.
Þú selur aðra þeirra og blóðmjólkar svo hina og þvingar til að gefa af sér mjólk á við fjórar kýr. Þú ræður svo sérfræðing til að komast að því hvers vegna hún datt niður dauð.

ÁHÆTTUFJÁRFESTINGAR - ÚTRÁSAR KAPITALISMI
Þú átt 2 kýr.
Þú selur 3 þeirra til fyrirtækis á opnum markaði með veði í gervifyrirtæki mágs þíns, gengur svo frá yfirtöku með vísan í skráningu á markaði þannig að þú færð allar 4 kýrnar tilbaka og skattaívilnanir vegna einnar til viðbótar.
Afurðarétturinn af kúnum 6 er færður yfir á fyrirtæki í Karíbahafinu, en leynilegur meirihlutaeigandi þess (sem ert þú sjálfur) selur þér síðan aftur réttinn að öllum 7 kúnum.
Samkvæmt ársskýrslu á fyrirtækið nú 8 kýr, með eignaréttarsaming að einni til viðbótar.
Þú selur eina kú til þess að þóknast ónefndum stjórnmálamanni og átt þá níu kýr.
Rétturinn að nautinu er seldur almenningi í hlutafjárútboði.

FRANSKT FYRIRTÆKI
Þú átt 2 kýr.
Þú ferð í verkfall, skipuleggur mótmæli og tefur umferð...vegna þess að þú vilt eiga þrjár kýr.

JAPANSKT FYRIRTÆKI
Þú átt 2 kýr.
Þú endurhannar þær þannig að þær verða tíu sinnum minni, en framleiða tuttugu sinnum meiri mjólk. Þú markaðssetur svo nýja teiknimyndahetju, 'Kúmann', sem nær miklum vinsældum um allan heim.

ÞÝSKT FYRIRTÆKI
Þú átt 2 kýr.
Þú endurhannar þær þannig að þær lifa í 100 ár, éta einu sinni í mánuði og
mjólka sig sjálfar.

ÍTALSKT FYRIRTÆKI
Þú átt 2 kýr.
Þú veist ekki hvar þær eru niðurkomnar. Þú ákveður að fara í hádegismat.

RÚSSNESKT FYRIRTÆKI
Þú átt 2 kýr.
Þú telur þær og kemst að því að þú átt 5 kýr.
Þú telur þær aftur og kemst að því að þú átt 42 kýr.
Þú telur þær enn og aftur og kemst að því að þú átt 2 kýr.
Þú hættir að telja og opnar aðra vodkaflösku.

SVISSNESKT FYRIRTÆKI
Þú átt 5000 kýr.
Engin þeirra tilheyrir þér í raun. Þú rukkar eigendurna fyrir geymsluna.

KÍNVERSKT FYRIRTÆKI
Þú átt 2 kýr.
Þú ræður 300 manns til að mjólka þær. Þú segir atvinnuleysi í lágmarki og
blómstrandi landbúnað. Þú handtekur fréttmanninn sem sagði frá stöðunni eins og hún er í raun og veru.

INDVERSKT FYRIRTÆKI
Þú átt tvær kýr.
Þú tilbiður þær.

BRESKT FYRIRTÆKI
Þú átt tvær kýr.
Báðar eru með kúariðu.

ÍRASKT FYRIRTÆKI
Allir virðast eiga fjölda kúa.
Þú segir öllum að þú eigir enga. Enginn trúir þér svo þeir sprengja þig í tætlur og ráðast inn í landið. Þú átt enn engar kýr, en þú býrð þó amk í lýðræðisríki núna...

ÁSTRALSKT FYRIRTÆKI
Þú átt 2 kýr.
Bissnessinn gengur vel.
Þú lokar skrifstofunni og færð þér nokkra kalda til að halda upp á það.

NÝ-SJÁLENSKT FYRIRTÆKI
Þú átt tvær kýr.
Sú til vinstri er asskoti löguleg.

Spaug dagsins!

Vitið þið að það er búið að breita nafni á KB-banka?

Í KGB-banka!

 

 

 

(djók!)

Rússarnir koma!

Ja hérna hér! Hvað varð af nú af "vinum" okkar í vestri? En eins og Hannes segir; "Það er ekki það sama kommúnismi og kommúnisti"!

Seðlabankinn fær lán frá Rússlandi

Niðurstaðan!

In your face, stuttbuxna-frjálshyggju-íhald!

Skuldir bankanna þjóðinni ofviða

Hefst nú sami söngurinn...

... um leið og það fer að harðna á dalnum hjá bönkum og fyrirtækjum. Nú keppast jakkaklæddir menn við eins og rjúpur við staur að ropa um nauðsyn þess að lækka skatta á banka og fyriræki. Talað er um að lækka skatta á fyrirtæki í 12% svo að þau geti nú blómstrað í þessari "niðursveiflu". Eins og menn átti sig ekki á því að þessi uppkjaftaða niðursveifla hefur jafnmikil áhrif á mig sem neytenda og bankastjórann og forstjórann! Ég eiginlega krefst þess að fá að njóta sömu kjara og fyrirtækin og bankarnir í landinu í skattamálum. Borga bara 12% tekjuskatt (helst engan) enda er ég að borga töluverðan skatt í formi virðisaukaskatts og annarra skatta (gjalda, eins og Geir H. vill nefna það).
Því ef ég ætti meir á milli handanna til að eyða, þyrfti ég ekki að taka neyslulán í formi yfirdráttar, (sem ég er ,sem betur fer, blessunarlega laus við) né endurfjármagna lánin vegna þess að ég skaut mig í löppina af neyslubrjálæði undanfarna mánuði (sem ég er reyndar blessunarlega verið laus við líka). Meira að segja sá ég það fréttum í kvöld að þjónustufulltrúar eru farin að agentera fyrir Íbúðarlánasjóð, helsta samkeppnisaðila bankana í íbúðarlánum, vegna þess að vextir eru svo háir! Sem sagt, ef bankadruslan getur ekki þjónustað mörlandann, getur hann bara farið á "ríkið".
Það heyrist ekki svo mikið hundsgelt frá verkalýðsforustunni um skattalækkanir og vaxtalækkanir og afnám verðtryggingar í síðustu kjarasamningum!
Þess vegna spyr ég: Fyrir hverja eru þessir menn að vinna? Alveg örugglega ekki fyrir sauðheimskan almúgann, svo mikið er víst!

Og eitt enn; hvernig í andskotanum losna ég við þessar fjandans auglýsingar af vefnum hjá mér? 

Sjúkleiki mannkyns

Þegar maður les fréttir dagblaða, fréttasíðna og annarra miðla, er ekki laust við að maður leggist í þunglyndi yfir sjúkleika mannkynsins. Fyrir utan þessa venjulegu pólitísku fréttir af stríði og átökum, rekst maður stundum á litlar fréttir þar sem sjúkleiki hugans kemur hvað sterkast fram. Bloggvinur minn, hin lífrænt ræktaða geimvera, Ólafur Fannberg, talar um það á bloggi sínu í dag um náunga sem átti samfarir við girðingu og var nappaður með allt niður um sig. Um daginn var það einhver gaur að reyna við reiðhjól. Ok, þetta virðist vera frekar "saklaus" gjörningur, en þó blöskraði mér fréttin á DV.is í gær, þar sem sagt var frá gaurum sem sóttust eftir því að horfa á miður falleg myndbrot, þar sem verið var að nauðga, berja og jafnvel myrða fólk í beinni! Og sömu aðilar hreinlega voru að hreykja sig á því að hafa horft á þetta! Hversu sjúklegt geta hlutirnir orðið? Í dag er sagt frá ungri stúlku í fangelsi í Suður-Ameríku, fimmtán ára samkvæmt fréttinni, sem var nauðgað af minnsta kosti 20 karlmönnum í fangelsi. Var henni varpað i klefa með þessum gaurum. Fréttin var að vísu frekar óljós um aðdraganda, en í þjóðfélagi þar sem mannslíf er einskins virði og engin virðing borin fyrir manninum, þá ætti manni ekki að undrast svona fréttir, en samt...þetta er sjúklegt!
Á vefsíðu, sem nefnir sig eftir meintum skapara heimsins, vaða uppi hugmyndir sem jaðrar við geðveiki og sýnir hreinlega fyrirlitningu á náunganum og þessir aðilar telja sig vera einhverjum öðrum "æðri" af því að einu að vera "útlendingur" eða í versta falli öðruvísi og hafa aðrar skoðanir. Þegar svo þessir "menn" fá á sig gagnrýni vegna þessara sjúku hugmyndafræði sinnar, er viðkomandi aðila hótað, pent að vísu, en það liggur í orðana hljóðan hvað þeir meina.
Málið er líka svolítið flóknara en að þessir hlutir eigi bara við daginn í dag. Saga mankyns er uppfull af slíkum viðbjóði þó svo að ainnan um komi fram lýsingar um glæsileika mannshugans, sigra og uppfinninga, þá stundum fallur það í skuggan á hinum sjúklegu athöfnum sem hreiðra um sig í hugskotum mannshugans og þjóðfélagsins. Þegar maður skoðar frumhvatir mannsins, það er að éta, skíta, anda og fjölga sér, þá áttar maður sig á að frumhvatirnar eru mun fleiri. Að niðurlægja, myrða, misnota, græða, virðast vera frumhvatir líka. Og það verra er að hin fjölmörgu stjórntæki sem menningarþjóðfélög hafa fundið upp, pólitíkin og trúmálin, virðast ekki geta ráðið við þessi öfl.
Þið kannist við Dauðasyndirnar 7? Hroki, öfund, reiði, þunglyndi, ágirnd, ofát og munúðlífi: Reyndar hafa þeir skipt út Leti fyrir þunglyndi (sjá Vísindavef) en mér sýnist að tími sé til komin að uppfæra þessar dauðsyndir eða erfðarsyndir allar uppá nýtt.

Þar til næst (ef það verður næst)